Late Show with QuincySuneo

5年前

每日大事記

Xanga宣佈執笠,慨嘆聲音此起彼落。各用户慌忙將珍貴嘅舊entry backup,同時又忙住喺Facebook傷春悲秋,呢頭講完唔捨得,轉個頭拜拜都未講,有關Xanga嘅洗版updates一個禮拜內徹底消失,消失得仲快過早幾年壇花一現嘅再用ICQ熱潮。我的確係有一個Xanga account,但從來冇正式用過。

喺Facebook未出現,大家仲有私隱嘅年代,我非常害怕Xanga subscription呢個function,因為一旦某user subscribe咗我,其他人就可以從該user Xanga上嘅subscription list度link到去我個Xanga度。有人會話:「你可以加friends lock架嘛」,呢點我當然知,但加咗的話又怕朋友次次要login之後嫌煩唔嚟喎,同埋其實留言又係要login,根本照顧唔到非Xanga用戶,加上Xanga個版面好難整得靚,所以唔係太想用。不過歸根究底都係嗰陣寫親嘅都係私人嘢,畀陌生人睇到自己寫嘅生活點滴係一件我唔想發生嘅事,所以我一直都係用緊一啲私隱度(看似)比較高嘅網站。


話說當年讀緊中學,考完會考等放榜,每日無所事事,唔係食就係瞓,見個女同學寫日記寫得咁過癮,於是就加入戰團寫埋一份,就係因為咁,我第一篇日記就喺2003年4月3日喺UDiary誕生,仲記得第一句係「呵呵~今日終於有街出喇!!」

UDiary年代非常簡單,嗰陣互聯網上好多嘢都唔完善,唔係逐個post有comment box,冇得好似而家咁方便撳個browse就可以揀一堆相upload上日記,亦冇得你話撳一下工具列個「B」字就有得將句嘢變粗體...就係因為咁,我學識咗極少量嘅HTML code,例如用img src貼相,#0000FF係藍色等等。但嗰陣要搵地方放相仍然唔係一件容易嘅事,放咗上Yahoo!相簿嘅相又唔可以embed落其他網站,所以日記都係以純文字為主。日記標題轉色、背景圖片都要搵網主Hero幫手,對於我呢啲非IT之人,識整個popup text「歡迎光臨」咁樣已經叫做好叻架喇。至於內容方面,寫嘅當然唔係咩大道理,九成都係非常「日記」嘅日記-記錄一日做過啲咩大小事,去過邊度,甚至有一排我加咗個column寫當日食咗啲乜嘢...話時話,當時仲未有support唔同電腦嘅香港字,要打個「嘅」字?打個細楷「o」再打個「既」字啦!

相信UDiary只係一個小本經營嘅網站,寫咗幾個月,網主Hero突然間話要搬server(如果我冇記錯)暫停一個月,結果一停就停到今日。UDiary年代嘅終結令我無奈咗好一陣子,因為要轉地方係一件好麻煩嘅事,更重要嘅係我唔係日日有backup我啲日記,結果後期嗰十幾篇跌晒落黑洞...

最後,我決定轉投ShowHappy嘅懷抱。ShowHappy初期,已經開始識得screen走啲冇人想知嘅嘢,例如嗰日食過啲咩(雖然一日食三包薯片又真係幾值得寫埋落去嘅),又或者係同邊個喺行過一個幾普通嘅商場呢類無聊嘢。到中期開始識得從感覺出發去寫嘢,曉得揀一啲非常開心(/唔開心)嘅事出嚟再elaborate一下,當然唔少得加歌下詞兼且bold埋重要嗰幾句(人生必經階段呀),亦開始加BGM落自己個blog度,印象中第一首放嘅歌好似係《世界之最(你願意)》...同期亦畀我搵到Photobucket呢個咁偉大嘅網站,日記開始變得圖文並茂,有朋友相、情人相、貓相、零食相、gag相,甚至我爺爺都出現過。後期互聯網發展一日千里,Photobucket唔再有小器嘅容量限制,日記嘅相因此變大,去台灣、去長洲同去Kelly演唱會嘅相有幾張係大大張架!另外不得不提嘅係我畀咗幾廿蚊做ShowHappy嘅VIP,目的係整走頁頂嘅廣告,務求整到個blog靚靚仔仔。可惜有一排ShowHappy個server成日出問題,有時幾經辛苦打完篇日記竟然可以save唔到咩都冇晒,加上眼見Blogger嘅配套同界面好似完善得多,於是做咗一個好大嘅決定-轉blog,轉咗嚟呢度(Blogger)。

其實喺ShowHappy較後期嘅時候,已經開始寫「關於自己」以外嘅嘢,會有朋友講錯嘢嘅金句,會有「給愛搖頭的華納高層之十萬個為什麼」一類懶係抱打不平,講晒大道理嘅文章。不經不覺間,大家撳入嚟嘅地方已經由「日記」變咗做「blog」。大家入到嚟,未必可以知道筆者做過啲咩,知道嘅反而會係筆者想做啲咩,同埋諗緊啲咩。Blog入面少咗自己同朋友嘅私人嘢,例如大家唔會再見到Josephine呢個名瘋狂地出現,亦唔會有意無意知道我某個ex住喺邊度,blog自此可以被公開喇。心態同以前相反,以前慌死人知道自己個blog address,好似天機不可洩露咁,而家由記敘文變做一種分享,反而覺得越多人睇越好。

科技發達,時代進步得太快,Facebook嘅方便令會坐定定,認真諗下自己想寫乜嘅人越嚟越少,各類型嘅blog處於準備被淘汰階段,Xanga壯烈地成為第一件犧牲品。今時今日眼見Facebook嘈喧巴閉,真真假假乜都share一餐,都係閂電腦早啲瞓為妙。 

原文:

請讚好 Late Show with QuincySuneo Facebook Page 支持一下~