自言自魚

3個月前

[親子] 屯門超大Party Room, 一家大細都岩玩

好多人都知QB媽一家住在元朗區, 平時無乜必要真係唔太想出城, 奈何成個新界西一間似樣的親子餐廳同Playhouse都欠奉, 要揾地方帶QB玩, 真係下下都有穿州過省出城既感覺! 好彩, 天無絕人之路, 前排比我無意間發現近近地既屯門有一間好有規模既Party Room, 收費唔貴, 而且最好係大人細路都有唔少野岩玩喎, 於是約埋同樣係3月生日既媽媽朋友一家一齊去玩下. 

​我講既係就近屯門市中心既「Why Open」Party Room, 係屯門站行過去, 大約10分鐘左右, 一D都唔難揾. 雖然係工廠大廈入面, 不過佔地全層, 感覺夠私癮同安全! 一入內, 有一排膠鞋櫃, 入屋除鞋係常識吧, 而店方亦很貼心提供拖鞋比大家換. 
​​
一入內, 可以用一望無際去形容! 全個場無樑柱位, 視野好開揚, 佔地有成3600呎, 真係超超超大呀!! 咁大既場, 包場開Party幾多人都無問題呀, 超正! 
​​
人少少包唔晒成個場, 仲有獨立房間可揀, 只要夠6個人就可以包房, 咁就易成事好多! 場內有3個獨立房, 都各有唔同特色同設計架, 如包房都可共用外面既設施. 
​​
房間好光鮮企理, 有一排梳化椅坐, 仲有D home feel , 幾舒服. 
​​
房內有獨立影院同卡拉OK, 無線咪, LED點歌營幕, 兩個小女孩歌癮大發, 即刻搶咪"高歌一曲"...不過全場無人聽得明佢地唱緊咩呀 XDDD
​​
另一樣好正既係電動麻雀枱, 打返幾圈減下壓超正喎...(雖然我唔係好識XDD)
​​
除左玩樂設施, 我仲留意到D依度既裝條都好有心思, 房間用左雲朵燈, 好特別.
​​
波波池上面就用左七彩波波燈, 好繽紛好靚, 仲好時尚添!
​​
另一個岩晒女仔打卡既係一排好長既花牆, 用上唔同色tone既花組成, 影相擺facebook/ ig 岩晒! 配合埋依張吊床, 兩位小閨密忍唔住跳上去轉一輪, 真係好可愛呀!
​​
想QB定定影幾張相, 一D都唔容易呀, 未數到3就走左去, 因為依度有好多吸引佢既野玩! 首先係依個大型波波池.
​​
足足有4米 X 4米咁大, 用上紛紅, 白, 透明色既波波組合, 真係好夢幻好少女, 唔止小朋友, 連媽媽都好喜歡呀! 
​​
而且個池夠晒深, 底下有軟墊, 即使跳入去都唔怕撞親腳. QB仲攪笑, 當泳池咁扮游水, 超攪笑..
​​
另一個要推介必玩既係依個全港獨家無敵閃避棒. 其實係一個吹氣設施, 配合會轉動既吹氣棒, 仲有快慢調較, 玩起來真係好刺激架.
​​
兩個小妹妹初初唔敢行過去, 但後尾爸爸訓身陪玩, 佢地又玩埋一份, 仲玩到鬼咁興奮添.
​​
另外仲有夾公仔機, 只要2蚊夾一次, 好抵玩! QB平時放學都成日嚷住去夾公仔, 今次無理由唔夾下, 好彩地夾左幾次就夾到, 有戰利品當然開心啦!
​​
仲特設左部即影即print photo booth, 一家人一齊影下合照留念好有心思.
​​
影得唔好, 可以再影過, 影到靚靚先print出來.
​​
D相既質素都唔錯, 一班人黎一定要影黎留念呀.
​​
鐘意唱K既, 嫌房內未能盡展歌喉, 可以係小型舞台開個小型concert, 150吋投影大銀幕, 加上專業既音響設備, 大展歌喉完全無問題.
​​
太耐無唱K, 幾位爸爸媽媽都歌癮大發, 歌曲選擇都算多, 而且有D新歌都有, 一定滿足到一眾歌神.
​​
好難得可以唱K, 又唔駛掉低QB; 佢有佢玩波波池, 我地有我地唱. 環境又安全, 唔怕佢地走失要睇到實, 絕對可以係同一屋簷下各自各精采! 親子之餘自己又可以減下壓, 好爽呀.
​​
除左小朋友設施, 仲好多岩大人既遊戲! 桌球就岩晒爸爸們玩啦. 
​​
原來桌球枱搖身一變仲會變成氣墊球枱, 更加老幼咸宜添! 同爸爸玩埋一局, 來來回回都未分出勝負, 但就夠晒減壓呀!
​​
另外仲有專業掟鏢機Dastlive 2, 又係爸爸既專利, 睇佢玩得幾投入同認真!
​​
都話男士們黎到完全唔怕會悶親, 唔駛怕要玩襟電話襟到無電黎Kill Time呀, 因為場內有好多岩玩男士玩既設施.  依部街機令男士入晒迷呀, 一玩就停唔到!
​​
除左玩樂設施, 仲有大大張梳化可以hea下, 又有bar枱, 爆谷機, 微波爐, 光波爐, 雪櫃等, 開party叫到會想整熱返或雪凍D食物都得, 好貼心呢! 

玩足4個鐘, 兩位小妹妹一D疲態都無, 真係「專業玩家」黎XDD! 最後竟然仲擺D公仔入肚, 話要扮大肚生BB, 真係比佢地笑死!
​​
依個Party Room真心好正, 亦係我去過佔地最大既, 大人同小朋友既玩樂設施都夠晒多, 而且絕不求其, 聽講遲D仲會有VR玩添! 爸爸已經話生日要黎依度開Party, 媽媽話有得唱K就夠, QB最緊要有波波池, 有朋友仔, 地方大周圍跑都得, 一定會再約朋友黎啦! 
​​
Why Open  (24小時營業) 
地址: 屯門新安街11號華泰工業大廈7樓
收費: 成人 $168/位, 小童3歲以上半價 
(6位以上可包房/ 30位以上可包場) 
詳情及預約: 5111 6669

合作邀稿, 文章內容全屬真實分享及個人意見, 只供參考之用~

聯絡合作和活動:

email: sherice_hy@yahoo.com.hk
Facebook: Mini Bubble Corner

Blogspot❤ ❤The Ztyle❤ ❤She.com❤ ❤wordpress
weshare❤ ❤博勢力❤ ❤Pixnet❤ ❤Beauty Exchange
mamibuy❤ ❤Oh!爸媽❤ ❤ 親子日常❤ ❤sundaykiss
esdlife❤ ❤chef-diary❤ ❤OpenRice