TutorCircle

3星期前

BA-啱我嗎?

港大文學士-啱我嗎? 

對於大學嘅科目好多人都一無所知,我曾經都係其中一個。
其實知道大學各科讀啲咩好緊要,中三選高中選修科嘅時侯要考慮大學想讀咩科;
中六選jupas choice就要真係要決定放咩科,一失足成千古恨架真係!

今次呢篇文章旨在介紹港大文學士課程,
等大家睇下自己適唔適合讀呢一科。

可能好多人認定文學生無將來,港大BA
但係我認為港大文學士其實係一科超級抵讀嘅科!
如果反應熱烈,遲下會寫埋其他大學嘅學科!

 

適合我嗎?

如果你未知道自己將來想做啲咩,未知道自己嘅興趣係咩,
唔想一嚟就決定自己讀乜嘅,港大文學士其實幾適合你;
如果你唔想淨係讀書,想試下讀書以外,大學其餘四件事,
文學士係一個好好嘅選擇;
如果你好肯定你嘅興趣係文學,當然文學士就更適合你啦。

港大BA

收生要求

港大文學士(Jupas code:JS6054)有多於300個學位,
而且入學無需要面試,淨係睇文憑試分數。
以往由2012至2016收生最低分係Best5 24分,而係2017仲降低到23分添。

只要你考到Best5 24分,又將港大文學士放jupas笫一位,
恭喜您,您已經入到港大啦!

港大BA香港大學課程結構

香港大學一年有三個學期:semester 1, semester2 及summer semester。
1個course等於6個credit。


港大文學士課程結構

香港大學文學士學位課程[BA(4)]為期四年。

港大要求文學生於每年最少讀十個course(60credits)最後就可以成功畢業 :
sem1及sem2各讀四至六個course(24-36credits)
summer semester則是選擇性質,大多數用嚟補讀翻啲course。

大部份人會Sem1及2各讀五個course(30+30=60credits)
咁就可以一年讀夠10course(60 credits)
同時,亦有人喜歡兩個sem都讀六個course(36+36=72credits),
其實只要你達到港大俾你嘅要求,你喜歡點樣分配courses/credits就可以點分配!

咁summer sem 係做乜架? 譬如你係sem1,2 一共淨係讀咗八個course(48credits),
你就可以係summer sem補番讀少咗嗰兩個course(12credits)
又或者你某啲course 唔合格咁你就可以係summer sem 補翻。

 四年入面,你只係要主修一個文學院提供嘅科目(讀夠該個科目其中十二個course)
每年讀一個文學生必讀嘅語文基礎課程
頭三年內讀夠六個common core course(每個港大學生都要讀的),
其餘嘅credits就係俾你鍾意讀乜就讀乜架啦!!

文學院提供22科主修科目同30科副修科目,主修科目包括:
中國歷史和文化、中國語言和文學、翻譯學、英文研究、語言與傳播、
比較文學、藝術學、語言學、歷史、音樂、哲學、
法語、德語、意大利語、西班牙語、
環球創意產業、美國研究、中國研究、歐洲研究、
香港研究、日本研究、韩國研究。

副修科目除了以上大部分科目外,仲包括:
非洲研究、佛學研究、阿拉伯語、日語、希臘語、
葡萄牙語、瑞典語、泰語、日本文化。好新奇有趣!

有好多文科人都會雙主修(double major),有啲仲會加多個副修,
重點係除咗必要主修一個文學科目、其他主修、副修係可以由其他學院提供架!
好多文科人都會主/副修個商學院或社會科學學院嘅科目
(例如:marketing,management,psychology 或sociology)

另外,對於選主/副修常見嘅問題係:

係咪成績好先選到想讀嘅科架?

NO! 只要你讀齊該科目要求嘅course你就可以申報主/副修!
舉例:您想主修環球創意產業,
咁只要你讀夠十二個環球創意產業既course(72credits)就無問題了!
但係,有啲科係比較特別,
例如英文研究要求DSE英文有5以上先可以主修,你哋可以上網再睇下架。

係咪選完就無得改?

NO!你可以一直改你嘅主修改到畢業,
前提係你可以係你畢業前完成申報該主/副修要求!真係有無敵嘅彈性!

一年級

文學士嘅第一年係俾你發掘自己興趣嘅一年。
第一年合共八至十二個course之中,你只係需要讀一個必讀英文班,
三個文學院可供主修/副修科目嘅入門課程,
其餘嘅Credits就係free electives—
即你學期完嘅時候,你先至要選擇至少一個主修(major)繼續修讀。

二至四年級

基本上同一年級一樣,
只係讀啲高級、深啲嘅course。
二、三年級仲有機會去exchange架!

港大BA為何選擇港大文學士?

一、水泡科

如果你考得唔係咁好,而你又無話對某啲大學嘅專科有興趣的話,
港大文學士係不二之選。
相比其他科,文學士俾你極大嘅自由,
就算你唔鍾意文科,入到去基本上可以讀其他學院嘅課程。
例如你本身想入港大社會科學主修心理學但唔夠分,咁你可以選擇文學士,
一年級嘅時候一樣可以得社科嘅入門課程,
二年級嘅時候一樣可以主修心理學,
唯獨是你要主修多個文學院嘅科目而已。
前提係十個有九個文學生都會雙主修(double major)。

二、超級有彈性上課時間

其實一個course都有好幾個時段,
所以你可以因應自己學業以外嘅時候事情去選擇翻比較適合嘅時段翻學!
我之前試過將所有堂編為兩日上,
一個星期七日淨係翻兩日咋!真係開心死!

三、選course自由度高

讀文學位但其實讀乜都得喎!港大比起其他U好在自由度大!
有啲u入學就已經係選定咗科,
例如你對英文有興趣,報CU就係直接報english,
但如果入到大學先發覺唔中意咪gg?!
HKU BA俾你跨faculty 去讀business、social science、science,
等你搵到自己興趣之外,主修一個文科,
提升你嘅㧗判性思考,何樂而不為呢?

四、唔逼你

社會科學學士學位課程其實一樣都好有彈性,
但係佢要求學生一定要去exchange;
商學士課程就一定要你做intern;
唯獨是文學士真係尊重你嘅選擇,鍾意去就俾你去,唔鍾意去就唔逼你!

五、最抵讀課程

最後,文學生可以好博盡,學到好多野;
最最最重要係俾時間你了解自己,認清自己嘅人生目標呀!

(原文: 港大BA)

此文章純屬 Tutor Circle Blogger 個人分享,並不代表本網誌立場。