巴士老伯咳聲惹乘客不滿大打出手 3男女合力「打到帽太陽眼鏡鞋都飛埋出嚟」

今日（11日）下午1時40分左右，當時巴士由愉景新城巴士站前往東涌，至青衣附近時，一名戴太陽眼鏡、坐在下層逃生門旁邊的老翁突然「咳了兩聲」，之後坐在旁邊的灰衫長髮女子以咳嗽聲還擊，「個女人特登好大聲咁咳咗幾聲，然後隔離藍衫白髮男人就好似玩咁樣，特登除口罩望住阿伯方向咳兩聲，然後個女人就望住阿伯話『我都識咳』，阿伯笑笑口話『我都識』」。

上載者指雙方初時僅口舌之爭，灰衫女亦開始講粗口大鬧老翁，未幾一名坐在附近的老婦突然調位坐在老翁對面，「我擔心佢哋有咩衝突所以即刻調咗位，然後拐杖阿婆唔知因乜事加入戰團，拎起拐杖襲擊阿伯」。她形容當時場面非常混亂，情況一發不可收拾，「灰衫長髮女人同拐杖阿婆瘋狂超狼死咁襲擊阿伯，阿伯俾佢哋打到帽、太陽眼鏡、鞋都飛埋出嚟，阿婆仲係咁攞支柺杖打阿伯同插阿伯，阿伯全程處於下風齋擋冇還手，個白髮藍衫男人唔知做乜嘢係咁捉住阿伯隻腳，得阿伯俾個女人同阿婆係咁打」。

從她拍攝的片段所見，在場所有乘客不斷大叫，希望4人能夠停手，「喂喂喂！報警啦報警！收手啦！你哋唔可以咁嫁」，惟4人未有理會他人勸喻，反而繼續拳拳到肉，其後有人通知車長，車長立即將車停低之後上前了解。

上載者在帖文中透露，司機指4人不停手繼續爭執便會報警，又要求他們分開坐，但灰衫女仍不肯停口繼續鬧，「最後阿伯一直瞌埋眼，直至我落車嗰陣諗咗一諗，我都有啲擔心阿伯，因為個女人坐咗去第二個位之後，阿伯一直都係合埋眼，於是我行返去前門嗰度敲門，同司機講叫佢睇一睇阿伯同report畀公司，因為阿伯一直瞌埋眼我都擔心佢有咩事」。上載者又補充，當時全車人都有喝止及叫4人停手，亦有叫司機上前調停事件，又指若自己亦行近或變成毆鬥，故「唔係拍片者不救，係不能救」。