自言自魚

Contact me: sherice_hy@yahoo.com.hk

[食譜] 越式撈檬(配自製酸汁)拼香茅豬扒

一個全職媽媽, 每天都要諗早午晚餐, 有時加埋小朋友餐, 早早就頭爆了. 靈感這回事, 消失左好耐, 依排不想提早腦退化, 決定把諗食咩的重任交比爸爸. 腦袋放輕鬆了, 但不代表煮飯這回事也變得輕鬆, 老闆一聲令下想食乜乜乜...我就要搖身一變成為家庭魔法王, 把未煮過或唔知邊度揾材料的食物變出來, 自己都覺得厲害呀. 今趟老闆無啦啦話想食越南撈檬, 個晚就變左出來啦. 

越南撈檬的材料其實都幾隨意, 但有幾樣不能缺少: 青檸, 蔥油, 花生碎, 炸蒜...其他的配料隨個人喜歡加入. 今次買不到檬粉, 改以瀨粉代替都可以, 只是粗幼之分. 另外, 為了有點肉氣, 同塲加映一個香茅豬扒, 所有香料在泰式或印尼店都會買到. 

撈檬材料:

檬粉 (或瀨粉)             4個份量
銀芽                            少量
扎肉/ 泰式魚餅          數片
甘筍絲                        半條
冬筍絲                        1條
花生碎 (買烤花生自己壓碎)      1小包
蔥花                            2棵
炸蒜                            4湯匙
芫茜                            少許

香茅豬扒材料: 
豬扒                           3片
香茅                           2支
蒜蓉                          2湯匙
炸蒜                          2湯匙
香葉                          1片
青檸                          半個
蔥油                          適量

越式撈檬精髓在那個酸甜汁, 市面上不多見有現成的售賣, 自己做其實也很簡單, 秘訣在於魚露, 糖水的比例是: 1份魚露= 2份糖 = 3份水

其他材料還有: 青檸, 檸檬, 辣椒粒, 蒜蓉, 羅勒葉. 把全部材料放入, 再試味至夠酸和甜度, 放置浸一小時後即可食用. (記得水要加凍開水, 不要用錯水喉水! ) 

蔥油同樣是越式撈檬的靈魂. 只要把蔥花加入油, 慢火爆1-2分鐘即可盛起備用.

撈檬的做法相當簡單, 準備好汁料和蔥油後, 就逐樣材料放入滾水中勺熟盛起備用. 因家中有2歲小朋友, 所以在這一步驟中我也盡量把所有材料都先灼熟, 確保安全 (地道的會有些材料如甘筍, 青瓜等是生吃的)

泰式魚餅煎香. 其他材料如甘筍, 冬筍, 銀芽, 檬粉都先用滾水灼熟.
 
之後放涼或放入雪櫃中冷凍. 然後依次把: 檬粉, 甘筍, 冬筍, 銀芽, 扎肉, 魚餅放入, 面層鋪上蔥油, 炸蒜, 芫茜, 花生碎等材料即成. 

香茅豬扒做法: 
- 豬扒先以刀背把兩邊拍鬆, 然後加入醬油, 糖, 生粉, 胡椒粉, 五香料, 青檸汁, 香葉, 香茅粒醃1-2小時.

- 煎香豬扒 (煎之前把黏在豬扒上的醃料挑走, 以免吃時影響口感.)

- 起鑊炒香蒜蓉和香茅碎

- 加入豬扒回鑊, 贊少許紹酒兜炒數下熄火上碟.

- 面層鋪上蔥花和炸蒜即成. 吃時可唧少許青檸汁更惹味.
至於撈檬, 吃時同樣可唧少許青檸汁, 和倒入酸甜汁拌勻吃, 的確十分有越式風味. 

雖然天氣已轉涼, 但吃點酸味味的食物都幾開胃又清新, 做法相當簡單, 只是準備功夫多一點. 老闆今次好滿意, 我的Magic又過關XD~
聯絡合作和活動:
email: sherice_hy@yahoo.com.hk
Facebook: Mini Bubble Corner

Blogspot❤ ❤Pixnet❤ ❤The Ztyle❤ ❤She.com❤ ❤weshare
Qooza❤ ❤UBeauty❤ ❤Beauty Exchange❤ ❤博勢力
Esdlife❤ ❤ chef-diary❤ ❤OpenRice❤ ❤mamibuy❤ ❤ubaby