車窗望

香港思方學會講師,車窗望的Blogger,就像一輛不會停的汽車,望出去,一直是不會停的風景,生活、思考、遊戲,就是這樣。

又係董建華



又係董建華。

如果一個城市,有所謂「城運」或者「市運」,香港都可算係衰足 20 年,由 97 年開始無耐就金融風暴,之後就沙士,然後董建華落台之後叫做平靜左一輪,但深層次社會問題冇解決到,之後到梁振英上台,就更係迅速崩壞,今晚撐警聚會直頭可以用恐怖黎形容。

仇恨治港。

終極問題,相信大多數香港人,尤其係年輕一代,會肯定香港係中共治下必然既滅亡趨勢,變成深圳市香港區。

不過值得留意既係,今次又見到董建華,好多人認為,佢就係香港沉淪既邪惡核心,昔日腳痛落台,心有不甘,團夥西環奪權禍港,煽動仇恨,製造警民對立,破壞司法獨立,由始至終都係「一日最衰董建華」。

所以好多人會憧憬,或者真係有一個所謂習核心,係明君,會最終引蛇出動、撥亂反正,然後之前種種問題例如 831 框架,只係董建華同佢成班垃圾從中作梗,寧左勿右搞出黎,只要將佢地一網打盡,香港就會重見天日,落實一國兩制,兌現普選承諾。
美好幻想。

呢個想像空間到底係真定係假,過多一個月就會知道,如果真係有,不妨樂見其事,反正爭取更多自主空間,謀定後動總唔會錯,人生流流長,爭取民主從來都係漫長。
而更大可能,老實講,只係一場美麗既幻想,對於中共存有幻想,歷史教訓總係令人失望,但亦不必灰心,亦唔駛話人地係港豬,畢竟其實你冇損失過D 乜,香港已經夠晒衰,恥笑港豬,犬儒一切亦毫無意義。

本來就預左寸土必爭的話,亦只不過係繼續咁樣做落去。反而係一個好機會,睇下到底咩人埋左咩班、去左邊度、做左乜野。